D’fhógair an tAire Dlí agus Cirt Jim O’Callaghan inniu feachtas earcaíochta Gardaí 2025. Osclófar an feachtas d’iarratais ar 6 Feabhra agus reáchtálfar é ar feadh 3 seachtaine.
Tacóidh soláthar de níos mó ná €2.48 billiún i mBuiséad 2025 le hearcaíocht comhaltaí nua Gardaí, foireann Gardaí agus Cúltaca Gardaí. Geallann an Clár don Rialtas freisin maoiniú a sholáthar chun ar a laghad 5,000 Garda nua a earcú thar na cúig bliana amach romhainn.
Dúirt an tAire O’Callaghan:
“Tá áthas orm gur ceapadh mé mar Aire Dlí agus Cirt. Tosaíocht ar leith domsa – agus seachadadh tábhachtach inár gClár don Rialtas – is ea méid an Gharda Síochána a mhéadú, ionas gur féidir linn níos mó gardaí a fháil ar an talamh inár bpobail.
“Osclóidh an feachtas earcaíochta nua seo ar 6 Feabhra agus beidh sé oscailte d’iarratais ar feadh trí seachtaine. Mar a deir an sluán, ‘is post fiúntach é’ agus tá súil agam go smaoineoidh an oiread daoine agus is féidir ar na deiseanna a chuireann gairm san Gharda Síochána i láthair agus go ndéanfaidh siad machnamh ar iarratas a dhéanamh.”
Leagann an Clár don Rialtas amach roinnt beart a bhfuil sé mar aidhm acu an Garda Síochána a neartú, acmhainní na heagraíochta a leathnú, agus tacaíocht a nuachóiriú chun dul i ngleic leis an gcoireacht. Áirítear orthu seo athchóiriú ar phróisis earcaíochta agus oiliúna na nGardaí chun cumas a mhéadú; scrúdú a dhéanamh ar thabhairt isteach cláir iontrála céimithe luathaithe don Gharda Síochána; agus cur i bhfeidhm Plean Caipitil nua Gardaí chun stáisiúin Gardaí nua-aimseartha, dea-fheistithe a sholáthar ar fud na tíre.
Ba chóir d’iarrthóirí ionchasacha cuntas a chlárú ar shuíomh gréasáin na bPost Poiblí áit a mbeidh siad in ann iarratas a dhéanamh nuair a thosóidh an feachtas ar 6 Feabhra.
