D’fhógair an tAire Sláinte Jennifer Carroll MacNeill inniu seoladh Eolaire Náisiúnta Tástála Géanómaí FSS do Ghalair Annamha agus Oidhreachtúla (Eolaire Tástála). Cuirfidh forbairt agus foilsiú an eolaire tástála seo ag Oifig Náisiúnta Géineolaíochta agus Géanómaíochta FSS (NGGO) feabhas ar úsáid tástálacha géanómacha agus ar chúram othar.
Forbraíodh an tEolaire Tástála i gcomhar le speisialtóirí cliniciúla agus saotharlanna ospidéil agus is cloch mhíle shuntasach é i bhfeidhmiú na Straitéise Náisiúnta chun Leigheas Géiniteach agus Géanómach a Luathú in Éirinn.
Dúirt an tAire Sláinte Jennifer Carroll MacNeill:
“Tá réabhlóid á dhéanamh ag géanómaíocht sa leigheas trí chóireálacha pearsantaithe d’othair trí thuar agus cosc galar a fheabhsú, agus teiripí nuálacha a fhorbairt nach raibh indéanta roimhe seo. Cuidíonn sé freisin le luathbhrathadóireacht fachtóirí riosca géiniteacha do riochtaí cosúil le hailse, diaibéiteas, agus galair chardashoithíocha, agus tacaíonn sé le teiripí spriocdhírithe d’ailsí ar leith, agus sin an fáth go bhfuil mo roinn tiomanta go hiomlán don Straitéis Náisiúnta ar Ghéineolaíocht agus Géanómaíocht a chur i bhfeidhm.
“Is céim thábhachtach sa turas claochlaitheach seo é seoladh Eolaire Náisiúnta Tástála Géanómaí FSS do Ghalair Annamha agus Oidhreachtúla inniu. Cinnteoidh an t-eolaire seo go bhfaighidh othair an tástáil cheart, san áit cheart, ag an am ceart, agus iarrtha ag an duine ceart, agus táim ag súil le comhoibriú leanúnach idir mo roinn agus FSS chun cur i bhfeidhm ár gcuspóirí foriomlána faoin straitéis a chur chun cinn, chun cóireálacha sláinte agus torthaí d’othair in Éirinn a fheabhsú tuilleadh.”
Ag cur béime ar thionchar dearfach na forbartha, dúirt an Dr Richard Hagan, Stiúrthóir Cliniciúil Náisiúnta Saotharlainne NGGO, FSS:
“Aithníonn an tEolaire Tástála tástálacha géanómacha is féidir le cliniceoirí a iarraidh bunaithe ar shraith comhaontaithe tásca cliniciúla agus critéir incháilitheachta. Cuirfidh an cur chuige seo atá bunaithe ar fhianaise feabhas ar úsáid tástálacha géanómacha agus ar chúram othar agus a dtaithí. Cinnteoidh an tEolaire Tástála go bhfaighidh othair an tástáil cheart, san áit cheart, ag an am ceart, agus iarrtha ag an duine ceart.”
