Tháinig an Grúpa Comhordaithe Éigeandála Náisiúnta le chéile arís ar maidin (Dé Céadaoin, an 8 Eanáir) chun plé a dhéanamh ar an gcur isteach atá á dhéanamh ag an aimsir fhuar leanúnach agus na rabhaidh aimsire is déanaí a d’eisigh Met Éireann.
Tá Rabhadh Aimsire Flannbhuí eisithe arís do chuid mhór d’Éirinn anocht, agus beidh sé i bhfeidhm ó 6pm anocht go dtí 11am Déardaoin.
De réir mar a leanann an aimsir an-fhuar, beidh sioc géar forleathan, oighear agus sneachta ar an talamh ag cruthú coinníollacha contúirteacha taistil, cur isteach ar thaisteal, agus d’fhéadfadh sé fadhbanna leasa ainmhithe a chruthú arís.
Beidh na teochtaí is ísle anocht arís idir -3C agus -8C. Beidh sioc géar, oighear nó oighear dubh agus paistí de cheo sioc ann. Beidh sé fós fuar feanntach Déardaoin freisin le sioc, oighear agus ceo sioc a mhairfidh ar feadh an lae in go leor ceantar.
Tá na hÚdaráis Áitiúla tar éis béim a chur arís air go bhfuil leapacha ar fáil d’aon duine gan dídean a bhfuil ceann de dhíth orthu. Tá Tionscnaimh Aimsire Fuaire i bhfeidhm ar fud na n-údarás áitiúil go léir, chun leapacha éigeandála breise a sholáthar do dhaoine gan dídean nuair is gá. Tá foirne for-rochtana ag leanúint de bheith ag obair le daoine gan dídean agus á spreagadh chun leas a bhaint as cóiríocht.
Tá iompar poiblí ag feidhmiú inniu fós, ach moltar do dhaoine seiceáil lena n-oibreoir roimh aon turas a dhéanamh, mar go bhféadfadh sé go gcuirfí isteach ar sheirbhísí de dheasca coinníollacha áitiúla. Iarrtar ar dhaoine atá ag baint úsáid as iompar poiblí am breise a fhágáil chun a dturas a dhéanamh.
Iarrtar ar úsáideoirí bóithre gach bóthar a mheas mar bhóthar contúirteach i gcomhthéacs oighear dubh forleathan, gan ach turais riachtanacha a dhéanamh, taisteal go mall agus am breise a fhágáil don turas chun rioscaí do chách a laghdú agus chun an brú ar na seirbhísí éigeandála a mhaolú.
Cuireadh criúnna Líonraí BSL agus conraitheoirí comhpháirtíochta amach chuig na ceantair go léir atá buailte agus tá siad ag athnascadh cumhachta nuair is sábháilte é sin a dhéanamh. Tá faisnéis fíor-ama faoi ghearrthacha cumhachta agus amanna athshlánaithe ar fáil ar an suíomh gréasáin PowerCheck. Aithníonn Líonraí BSL an cur isteach a dhéanann sé seo ar shaol teaghlaigh agus tráchtála, agus gabhann siad buíochas leis na custaiméirí atá buailte as a bhfoighne agus na criúnna ag obair chun cumhacht a athbhunú go sábháilte.
Má thagann tú ar shreanga leagtha nó líonraí leictreachais damáistithe, ná teagmhaigh leo agus ná téigh ina ngaireacht RIAMH mar tá siad BEO agus thar a bheith contúirteach. Tuairiscigh aon damáiste do bhonneagar leictreachais trí ghlao a chur ar 1800 372 999.
Comhairle sábháilteachta poiblí
- Bíodh do ghuthán luchtaithe agat agus beir leat é ar gach turas. I gcás éigeandála, glaoigh ar 999 nó 112.
- D’fhéadfadh an aimsir gheimhriúil seo cur isteach ar iompar poiblí, agus moltar do dhaoine seiceáil le hoibreoirí seirbhíse chun na nuashonruithe is déanaí a fháil ina gceantar.
- Coinnigh súil ar réamhaisnéisí Met Éireann agus/nó tabhair cuairt ar shuíomh gréasáin Met Éireann don eolas is déanaí. Tá eolas ar fáil ar ardáin na meán sóisialta agus foinsí eile nuachta.
- Tá gach briseadh seirbhísí FSS ar shuíomh gréasáin FSS agus déantar é a nuashonrú go rialta. Bíonn eolas ar fáil freisin ar chainéil meán sóisialta FSS. Tabhair faoi deara gurb iad na clinicí gortuithe áitiúla an rogha is fearr má theastaíonn cúram leighis uait tar éis sleamhnú/titim.
- Moltar do dhaoine seiceáil ar dhaoine scothaosta nó leochaileacha ina bpobal.
- Soláthraítear comhairle bhreise ar ullmhú don drochaimsir ar an suíomh gréasáin Bí Ullamh don Gheimhreadh
- Moltar d’fheirmeoirí gach réamhchúram a ghlacadh agus iad ag plé le beostoc agus ag obair leo féin.
