Reáchtálfar taispeántas pobail de Dhréacht-Phlean Athghiniúna Lár an Bhaile sa Sciobairín Dé Céadaoin 13 Nollaig ag Halla Baile an Sciobairín. Beidh an ócáid á óstáil ag na comhairleoirí Cunnane Stratton Reynolds agus A Playful City, le tacaíocht ó Chomhairle Contae Chorcaí chomh maith le baill d’Fhoireann Bhaile an Sciobairín.
Tá an Plean Athghiniúna don Sciobairín ag céim dréachta mar chuid den tionscnamh náisiúnta Lár an Bhaile don Chéad Uair agus cuirfidh an imeacht taispeántais pobail na smaointe a tháinig chun cinn tríd an bpróiseas comhairliúcháin i láthair. Ó seoladh an suirbhé comhairliúcháin tosaigh i mí Lúnasa 2023, tháinig 930 aighneacht ón bpobal i gcoitinne, chomh maith le roinnt cruinnithe poiblí agus grúpaí fócais.
D’fhreastail thart ar 80 duine ar an gcéad chruinniú faisnéise i mí Mheán Fómhair agus d’eascair grúpa fócais nó ‘foireann baile’ d’ochtar ionadaithe pobail as an imeacht sin. I mí Dheireadh Fómhair, in ainneoin drochaimsire, thug cúig rannpháirtí dhéag chomh maith le hionadaíocht ó fhoireann deartha an phlean agus an Chomhairle faoi cheardlann Siúlóid agus Labhair.
Reáchtáladh ceithre cheardlann Foirne Baile eile le dhá mhí anuas, chomh maith le cruinnithe le Baill Tofa Chomhairle Contae Chorcaí chun rannpháirtíocht níos dírithe a éascú idir an fhoireann deartha, an pobal agus an Chomhairle. Bhí an rannpháirtíocht seo thar a bheith luachmhar chun an fhoireann deartha a threorú tríd an bpróiseas chun fís chomhroinnte a fhorbairt don Sciobairín.
