Tá an tAire Sláinte Jennifer Carroll MacNeill tar éis aird a tharraingt inniu ar mhéaduithe ar lucht saothair cúraim sláinte agus ar ghníomhaíocht cúraim sláinte agus na táblaí sonraí náisiúnta is déanaí ar staitisticí cúraim sláinte neamh-airgeadaíochta á bhfoilsiú. Ligeann na sonraí seo do thaighdeoirí agus don phobal níos leithne rochtain thráthúil ar fhaisnéis náisiúnta agus soláthraíonn siad tuiscint níos fearr dóibh ar shonraí na hÉireann ar raon ábhar sláinte.
Áirítear ar na táblaí a foilsíodh staitisticí náisiúnta cúraim sláinte a thiomsaigh an Roinn Sláinte mar chuid den cheistneoir Staitisticí Cúraim Sláinte Neamh-Airgeadaíochta, a riarann Eurostat, an OEC agus an Eagraíocht Dhomhanda Sláinte (EDS) i gcomhpháirt. Is é seo an tríú heagrán de na táblaí a fhoilsítear go bliantúil, roimh a scaoileadh ag Eurostat agus an Eagraíocht um Chomhar agus Forbairt Eacnamaíochta (ECFE).
Is éard a dúirt an tAire Carroll MacNeill: “Leis na sonraí don bhliain 2024, léirítear méadú seasmhach i lucht saothair cúraim sláinte in Éirinn. Tá ardú 4% ar líon na ndochtúirí, ardú 3% ar líon na gcnáimhseach, agus ardú 6% ar líon na n-altraí i gcomparáid le 2023. Ina theannta sin, tá méadú leanúnach ar líon na gcéimithe sna réimsí seo.”
“Leis an méadú ar líon na ngairmithe cúraim sláinte atá ag cleachtadh agus na staitisticí maidir le gnáthaimh mháinliachta a bhailiú, léirítear tiomantas an rialtais seo chun feabhas a chur ar chaighdeán na seirbhísí cúraim sláinte in Éirinn, agus na torthaí is fearr a chinntiú d’othair.”
“Le foilsiú na staitisticí náisiúnta cúraim sláinte seo, léirítear freisin ár dtiomantas don trédhearcacht agus do scaipeadh faisnéise ríthábhachtaí sláinte. Trí mhodh rochtana éasca ar na sonraí seo a sholáthar, táimid ag cumasú taighdeoirí agus an pobal leis na huirlisí atá ag teastáil uathu chun tuiscint níos doimhne a fháil ar sheirbhís sláinte na hÉireann.”
Is éard a léirítear leis na sonraí:
- bhí 76,558 altra ag cleachtadh in Éirinn in 2024, méadú 5.5% ó 2023
- measadh go raibh 2,560 fiaclóir ag cleachtadh in Éirinn in 2024, méadú 3.8% ó 2023
- bhí 6,250 cógaiseoir ag cleachtadh in Éirinn in 2024, méadú 8.8% ó 2023
- b’ionann líon na gcéimithe i réimsí staidéir a bhaineann le sláinte agus 3,455 mac léinn in 2023, méadú 1.6% ón mbliain roimhe sin. Áirítear ar na réimsí staidéir seo leigheas, altranas, cnáimhseachas, fiaclóireacht agus cógaisíocht
- ba é máinliacht cataracts an gnáthamh máinliachta ba choitianta in Éirinn in 2023 le 44,105 gnáthamh san iomlán, i gcomparáid le 39,347 gnáthamh in 2022
- bhí 13,491 gnáthamh athsholáthair cromáin in 2023, i gcomparáid le 12,830 gnáthamh in 2022
- in 2024, bhí 89 aonad MRI ag feidhmiú in Éirinn, le beagnach 85% díobh in úsáid i suíomh ospidéil
