An chéad Chreat Beartais agus Straitéise um Mór-Imeachtaí Spóirt Idirnáisiúnta in Éirinn foilsithe
• Cloch mhíle thábhachtach do spórt na hÉireann agus fís uileghabhálach leagtha amach le haghaidh mórimeachtaí spóirt idirnáisiúnta a óstáil
• Tá sé mar aidhm ag an mbeartas tógáil ar rath na hÉireann ó thaobh óstáil a dhéanamh ar mhór-imeachtaí spóirt idirnáisiúnta go dtí seo
• Leanann foilsiú próiseas fairsing comhairliúcháin agus taighde ar an gcleachtas is fearr go hidirnáisiúnta
Inniu d’fhoilsigh an tAire Turasóireachta, Cultúir, Ealaíon, Gaeltachta, Spóirt agus Meán, Catherine Martin, agus an tAire Stáit don Spórt, don Chorpoideachas agus don Ghaeltacht, Thomas Byrne, polasaí nua rialtais agus creat straitéise i gcomhair Óstáil Mór-Imeachtaí Spóirt Idirnáisiúnta.
Is é seo an chéad bheartas dá chineál in Éirinn agus leanann sé próiseas cuimsitheach comhairliúcháin phoiblí, lena n-áirítear rannpháirtíocht dhíreach le comhlachtaí spóirt, comhairliúchán le príomhpháirtithe leasmhara agus athbhreithniú ar bheartais inchomparáide i ndlínsí eile.
Eascraíonn foilsiú Chreat Beartais agus Straitéise um Mór-Imeachtaí Spóirt Idirnáisiúnta as gealltanas i gclár an Rialtais straitéis a fhorbairt chun an cineál mór-imeachtaí spóirt ar féidir agus ar cheart d’Éirinn tairiscint a dhéanamh ina leith a aithint agus conas is féidir na himeachtaí seo a úsáid chun rannpháirtíocht sa sport a mhéadú, turasóireacht intíre agus idirnáisiúnta a spreagadh, agus Éire a chur chun cinn.
Is féidir leagan Gaeilge agus Béarla den pholasaí a léamh anseo
Ag labhairt inniu, dúirt an tAire Catherine Martin:
“Tá sé tábhachtach nuair a dhéanaimid infheistíocht i Mór-Imeachtaí Spóirt go bhfuil muid soiléir faoi na buntáistí is mian linn a bhaint amach ón infheistíocht sin. Sa chreat beartais agus straitéise seo tabharfar treoir d’oifigigh, do choistí rialaithe náisiúnta spóirt agus do phoiblitheoirí imeachtaí agus iad ag forbairt tograí le haghaidh mór-imeachtaí spóirt idirnáisiúnta chun na torthaí agus na tairbhí is fearr a bhaint amach.
“Is gné an-suntasach den turasóireacht dhomhanda í turasóireacht a bhaineann le spórt, le margadh ilmhilliún euro agus poitéinseal ollmhór do thíortha a bhfuil seasamh ceart acu. Tugtar deis uathúil i Mór-Imeachtaí Spóirt Idirnáisiúnta chun aird a tharraingt ar oileán na hÉireann mar cheann scríbe iontach saoire, chomh maith lena bheith ina láthair iontach le haghaidh imeachtaí spóirt.”
Dúirt an tAire Thomas Byrne chomh maith:
“Léiríodh in Éirinn go bhfuil ar a cumas imeachtaí móra idirnáisiúnta spóirt a óstáil go rathúil agus féachann foilsiú an bheartais seo le tógáil ar an rath sin. Chomh maith le bheith ina n-ócáidí spóirt iontacha iontu féin, tá an poitéinseal ag mór-imeachtaí spóirt idirnáisiúnta rannpháirtíocht sa spórt a spreagadh agus oidhreacht fhiúntach spóirt a chruthú. Cuireann siad le trádáil, turasóireacht, rannpháirtíocht pobail, forbairt réigiúnach agus fás eacnamaíoch. Spreagann na himeachtaí seo mórtas náisiúnta freisin trí Éire a chur ar an stáitse domhanda agus bíonn tionchar acu ar an gcaoi a bhfeicimid sinn féin mar náisiún agus ar an gcaoi a mbreathnaítear orainn go hidirnáisiúnta.
“Agus an chéad Chreat Beartais agus Straitéise riamh de chuid na hÉireann um Mór-Imeachtaí Spóirt Idirnáisiúnta á fhoilsiú ag an Rialtas, tá cur chuige níos straitéisí á leagan amach ag an Rialtas agus é ag tairiscint agus ag óstáil imeachtaí móra spóirt idirnáisiúnta. Is mian linn an leas is fearr a bhaint as na tairbhí d’Éirinn agus oidhreacht rannpháirtíochta spóirt marthanach a chinntiú gach uair a bheidh Éire ina hóstach ar imeachtaí dá leithéid. Táim ag súil go mór leis an obair seo a chur chun cinn tuilleadh.”
